【吃喝】九洲拉麵殺入元朗 @金田家
上個星期六就同CHICKEN 入元朗，
行下行下大家見攰，就想搵間野坐低，
去到形點一期又唔係太見到有餐廳，
睇左下地圖，竟然比我地發現呢到有金田家@@！
兩個拉麵控二話不說走左過去~~
▲金田家對於我同CHICKEN 黎講已經唔陌生，
因為平時係銅鑼灣果間都成日去食，好中意佢地既湯底同麵質～
▲因為星期六所以都幾多人，排左陣隊先有得入，
原來元朗呢間岩岩開業冇耐，唔怪得特別多人。
▲所以拉麵都圖文並茂，可以比到大家做參考，呢間主打做豚骨湯底，
拉麵款式相比其他會比較多，豚肉亦有叉燒同黑豚選擇。
小食同飲品都有多種選擇，有肚仲可以嗌埋個甜品～
▲可爾必思，乳酸性飲品，入口酸甜開胃，
冰涼口感令人為之一振，解除唔少因排隊而屈落黎既悶氣。
▲北寄貝海鮮沙律，份量適中，以薯仔同北寄貝作主調，
北寄貝鮮甜爽口，配搭係沙律之中，格外匹配。
而蔬菜沙律頗新鮮，可惜既係北寄貝份量唔算多，食得未夠過癮。
▲黑松露拉麵，揀左硬麵質。豚肉湯配上黑松露，令整體格外濃郁，而且食落去唔會有油膩感。
▲硬麵質既條狀感比較強烈，吸附唔算高但好岩我依類中意嚼野既人。
黑豚為薄切，肥瘦均勻，入口軟腍。
▲黑松露再加上豚肉湯的確夠讚，松露香味久久不能散去，回味非常。
呢個湯底偏向中意濃味人士，對於無法抗拒既松露香，可以話係食之享受！
▲柚子芝士蛋糕，柚子味清新香口，淡淡香甜味，
口感細軟，食落去唔會太膩，抵讚～
整體黎講，元朗分店依然KEEP到水準，同銅鑼灣果間差別唔大，仲多左款揀，
不過環境相比起黎，就比較商業化，不過食物KEEP到係重大加分位，去幾次都依然想一食再食～
